霍震霆（左）同霍啟山通宵睇世界盃決賽。
早前，一眾政商界名人出席在港舉辦嘅法國國慶酒會，講起香港同法國嘅文化差異，個個都感受深刻。香港工業總會主席Stanley劉展灝話，法國人賣嘢重質不重量，好識吊住顧客胃口。懲教署署長單日堅就話兩年前參觀法國監獄，原來法國男監獄有女性懲教員參與管理，但喺香港就冇可能有咁樣安排。
劉展灝（左）同冼雅恩身在珠寶鐘錶行業，對法國自然十分熟悉。
單日堅參觀法國監獄，令他大開眼界。
港商品一熱賣就量產
單日堅話從硬件方面睇，法國監倉同香港分別不大，但係管理上差異好大。由於法國囚犯毋須工作，所以囚犯日常生活好似外國劇集咁，可以與囚友短聚，無所事事時，最常見嘅活動就係健身，所以好多犯人都好大隻。
轉頭見到Stanley劉展灝同萬雅珠寶董事兼總經理冼雅恩等人。做鐘錶生意嘅Stanley盛讚法國自創品牌方面做得好好，值得香港借鏡。
佢又話香港做嚟做去都係代工生產，而且產品一旦熱賣，往往就大量生產滿足市場需求，唔似法國人重質不重量，好識吊住顧客胃口。
霍震霆與啟山熊貓眼
港協暨奧委會會長霍震霆同二仔霍啟山兩仔爺就帶住對熊貓眼出席酒會，實係通宵睇世界盃決賽喇！霍震霆笑笑口話十月份阿根廷將會來港踢友誼賽，所以自己梗要捧阿根廷場，不過可惜對手德國太強喎！至於啟山鍾情嘅英格蘭一早出咗局，佢留意到法國前鋒賓施馬表現相當唔錯，可惜無緣躋身決賽，惟有寄望佢哋下屆爭氣啲，捲土重來啦！
第一手消息請下載on.cc東網
