話說早前反對新界東北發展撥款嘅示威者，接連多個星期五都喺立法會門外聚集，由於當時有唔少議員助理暗幫示威者混入立會，搞到立會行政管理委員會要落強硬指示，禁止幾位涉事議助出入立會。

設計圖片

據聞行管會一刀切禁止議員助理去停車場，擾亂晒議員同助理嘅工作生態。事關議助除咗幫議員寫稿、度橋外，好多時都做埋「跑腿」，當忙出忙入嘅議員臨時要文件時，助理通常以最快速度將文件拎到停車場，同以車代步嘅議員喺車上交收，所以停車場早已變成議員同助理之間嘅「物流中心」。但係新規定令「物流中心」運作失靈，好多尊貴嘅議員於是叫司機上辦公室拎，聽聞連司機都勁呻，點解做埋助理嗰份工喎！不過，立會搞成咁，其實都係迫於無奈，而立會秘書長陳維安都係按行管會決定做嘢啫！

立會搵人揸穿梭巴

除咗加強保安，立會最近仲招聘臨時司機，合約期只得一年，但就講明要熟悉全港街道路線，仲要識駕駛穿梭巴士。大家冇睇錯，係要識揸穿梭巴士。唔通立會秘書處有先見之明，預計到未來立會有更多大型對抗，所以要請定臨時司機揸巴士，一車車咁護送一班議員離開，等佢哋免受包圍？

秘書處回覆我哋，原來係有立法會司機因事請長假，所以先要急急腳搵人頂檔一年，仲話唔係要請司機運送議員離開喎！話雖如此，但以現時政治生態嚟睇，立會秘書處諗吓點樣幫班議員安全離開立法會，都不失係個未雨綢繆嘅好主意。

第一手消息請下載on.cc東網iPhone/iPad/Android/Windows Phone Apps