新一屆區議會喺明年底進行選舉，往屆區選無論係泛民定係建制派，都少不免出現自己人打自己人嘅場面。據聞港島區嘅建制派已率先講掂數，包括建仔、工聯會、富貴黨同新民黨，初步同意每區只派一位建制派出選。不過，距離選舉仲有年半，屆時係咪按照劇本進行，繼續「和諧」落去，真係天知道。
消息透露，港島區有關人士已同各黨派做好「零撞區」安排，唔止建仔同工聯會唔會爭食，連搶攻中產票源嘅富貴黨同新民黨都傾掂數，唔會同時派人出選分薄票源。
好似東區兩大中產票倉如康山、康怡加太古城就歸新民黨，而南區如薄扶林、赤柱，灣仔渣甸山、中西區衛城等高尚住宅區就交畀富貴黨。兩黨本身已有嘅議席，亦唔會有其他建制派出選攪局。不過，其他選區就繼續爭崩頭。好似新界東，唔少選區都增加議席，多個香爐多隻鬼，睇怕要爭餐飽喇！
第一手消息請下載on.cc東網
