做人老竇，有乜嘢開心得過抱孫呢？就係抱第二個孫囉！咁有乜嘢開心得過抱兩個孫？咁一定係抱龍鳳孫喇！新民黨副主席「田二少」田北辰就犀利啦，二十四小時之內一次過實現晒兩個願望，呢啲咪叫喜事成雙囉。

田北辰到醫院探望外孫女，即刻笑晒。

田二少長女前日啱啱生咗個BB仔，首次升呢做公公嘅田二少已經開心到飛起，仲話孫仔特別乖，專登提早出世等公公可以有時間睇世界盃決賽。點知隔咗十幾個鐘，三女即刻追生個BB女，田二少二十四小時抱龍鳳孫，唔知係咪創咗政壇紀錄呢？

田二少嘅大佬田北俊早已兒孫滿堂，田二少曾經多次公開恨抱孫。好彩佢一口氣追番兩名乖孫，可以同大佬拉近距離。田二少仲話今年係佢同太太結婚四十周年，一年內有咁多喜事，證明佢行緊運喎！

第一手消息請下載on.cc東網iPhone/iPad/Android/Windows Phone Apps