政壇：胡曉明想同之鋒溝通
學民思潮召集人黃之鋒近日忙於搵學校，前日佢仲大大聲話報讀咗香港城市大學公共行政副學士課程獲取錄，不過轉頭佢又被發現去咗樹仁大學報讀社會科學學系。尋日我哋見到城大校董會主席Herman胡曉明，問起佢對於黃之鋒如果真係入讀城大嘅意見。佢話學校會做到有教無類，又指自己都好有興趣認識吓呢個年輕人喎！
設計圖片及對白
近日中學文憑試放榜，黃之鋒嘅成績備受矚目。自稱中文科考獲4、通識科考獲5嘅黃之鋒，並冇透露其他科目成績，但就話自己考到入讀大學嘅最低要求。Herman對我哋講，話佢都有留意黃之鋒報讀城大副學士嘅消息，但就算呢位「異類」做咗城大嘅人，Herman都唔會特別對待佢，因為入得城大，就算日後畢咗業都係城大嘅一分子，而且一間大學應該有教無類，佢哋嘅責任應該係盡量畀多啲機會啲學生，等佢哋有多方面嘅體驗，豐富佢哋嘅人生。
唔肯講係咪報讀樹仁
至於佢自己亦有興趣想識吓呢一個後生仔，Herman話雖然大家嘅政治理念未必一樣，但都會想多啲了解黃之鋒嘅諗法。而佢咁多年嚟投身青年事務，接觸過好多唔同嘅年輕人，覺得黃之鋒亦唔例外，仲話除非黃之鋒唔想，否則佢亦好歡迎黃之鋒同佢溝通。
尋日政務司司長林鄭月娥喺立法會內委會宣讀政改諮詢報告嘅結果時，黃之鋒都好關注，仲暫時放低自己搵學校嘅事。
當我哋問佢係咪前日去咗報讀樹仁大學時，佢就話要專心睇政改諮詢報告直播，暫時唔想講呢啲嘢住喎！
