三堆一爐再跪低 施政無能不消提

雖然財委會連日加開會議審議受「大塞車」影響嘅議案，但結果仍一如所料，包括「三堆一爐」在內嘅十多項撥款未能處理。主席吳亮星話喎，幾時能夠處理三堆一爐撥款申請，稍後再作評估。

其實使乜評估吖，睇怕都係凶多吉少嘅喇。呢，議事堂內唇槍舌劍，外面同樣充滿火藥味，繼前日有區議員喺身上淋道具血水表示抗議之後，再有團體操上立法會，抗議擴建堆填區，要求當局先撤回項目。亦有團體集會遊行，話到明如果財委會強行通過三堆一爐撥款，會考慮將行動升級，佔領將軍澳環保大道添，認真夠激。

講真，垃圾問題困擾香港多年，現有堆填區已經不堪負荷，好快就會飽和，擴建迫在眉睫。而興建焚化爐同樣唔可以無了期再拖落去，一旦堆填區爆滿，垃圾無處可倒，香港變成「垃圾港」，絕對唔係危言聳聽o架。

好多人都明白，垃圾問題早一日解決，香港就少一分壓力。三堆一爐之所以反對聲音咁大，除咗部分政客將政治利益凌駕公眾利益，港府官員冇做好諮詢、游說同宣傳，抱着僥倖心理霸王硬上弓，唔撞大板至奇吖。上次僥倖闖過立法會工務小組一關，港府以為有運行，冇吸取教訓做好善後，卒之喺財委會跪低，簡直係唔衰攞嚟衰。

一葉知秋，三堆一爐跪低，只係港府頭頭碰着黑，施政處處碰壁嘅縮影咋。呢個政府講就天下無敵，做就冇心冇力，窩囊無能，授人以柄，正如鄧小平話齋，好似維吾爾族姑娘頭上嘅辮子咁，一抓一大把。

話時話，除咗三堆一爐搞到一鑊泡，新界東北發展計劃亦係寸步難行，仲有發展大嶼山同興建機場第三條跑道，到依家仲係唔湯唔水半天吊，樓市「雙辣招」更加幾乎被廢，話就話政策「成熟一項，推出一項」，查實係「推出一項，跪低一項」，你話係咪得啖笑吖。

冇法子喇，家陣社會高度政治化，行政立法劍拔弩張，議事堂內烏煙瘴氣，經濟民生根本冇人理，好似三堆一爐呢啲咁大爭議性嘅項目，要成功闖關簡直難過登天。計太一叮話齋，如果當局唔改善施政，諗計拆掂佢，就算立法會復會後再摷番出嚟，都係盞搞嘅咋，叮！