設計圖片及對白
講保育容易，但講到保育嘅錢就唔易。舊年施政報告提出要檢討保育私人歷史建築政策，而政府現正進行為期兩個月諮詢，古物諮詢委員會同發展局尋日就去由劉皇發領軍嘅鄉議局聽班鄉紳意見。
「最大地產霸權係政府」
班鄉紳話，其實村民唔介意交出間屋或祠堂保育，但要請顧問、又要出錢維修，點負擔得起喎，最好就係政府收購咗啲有歷史價值嘅建築物；亦有鄉紳好激動，不滿政府劃一劃、點一點就話呢度要保育、嗰度係郊野公園咁喎。
有鄉紳話，好似郊野公園用地咁︰「漁護署署長行過見幾好就劃一劃，就話係郊野公園地」，直斥「最大嘅地產霸權就係政府！」仲叫審計署研究吓政府喺郊野公園管理方面使過幾多錢，「一個仙都冇，正一霸住廁所唔拉屎！」
依家政府只係做諮詢，但班鄉紳已經起晒弶，無他嘅，皆因政府紀錄唔好囉，將啲私人土地納入郊野公園範圍，莫講話起樓，種棵植物都唔得，難怪鄉紳咁多怨氣，連發叔都話過打官司嘅說話，依家鄉紳開聲叫政府買，都係一種解決辦法，只係公帑孭唔孭得起就唔知囉。
第一手消息請下載on.cc東網
