政壇：吳宏斌為孫女反「篩選」
都市人經常不快樂，提升快樂指數基金（基金）同清華大學（香港工商界）校友會尋日合辦心理健康午餐講座，請到香港知名精神科專家黃重光醫生向大家傳授健康貼士。基金主席吳宏斌（Dennis）會前披露近期佢嘅一個小煩惱，仲勁呻反對「篩選」，原來佢個孫女報讀某間小學，面試咗四次仲未有結果，唔講仲以為佢講緊政改方案添！Dennis仲話，件事反映香港嘅教育制度好有問題，特別係畀家長帶來相當大嘅精神壓力，唔怪得香港人壓力咁大喇！
吳宏斌（左）及吳國安（右）請精神科專家黃重光（中）傳授健康貼士。
黃重光醫生話，有調查顯示香港有四分之一嘅人患有精神心理疾病，所以要活得健康快樂，精神同心理健康特別重要。佢仲奉勸大家要多食蔬菜、多做運動之餘，仲要記得多啲笑。
