吳克儉（前）尋日到沙田威爾斯親王醫院探望太太。
教育局局長吳克儉（吳得掂）尋日中午喺沙田威爾斯親王醫院出現，有病？唔係，據講係去探望愛妻！據了解，吳太尋日朝早見唔舒服需急召白車送入急症室治療，令當時身在保良局蔡繼有學校出席結業頒獎典禮嘅吳得掂心急如焚，最後提早一小時離開，趕去醫院探望太太。消息話，吳太今年唔係第一次入醫院，但吳得掂就話唔方便透露太太嘅病情，只係話多謝大家關心。
吳得掂匆匆來去學校結業禮同醫院，下晝又趕去立法會出席財務委員會會議，好彩喺午飯時段前已經由教育局副局長楊潤雄代佢出席財委會，吳得掂可以喺附近食個午飯。不過，食飯期間都撞正四個議員，結果又畀議員質疑點解佢顧住食飯，都唔出席會議。吳得掂急忙解釋，話既然楊潤雄已經代佢出席會議，所以費事中途臨時換人咁話。
話時話，楊潤雄都算係立法會嘅常客，但尋日出席財委會時，一度畀財委會主席吳亮星叫錯佢做「楊建雄」。唉，副局長成日被人搞錯，點算？
第一手消息請下載on.cc東網
