政壇：建仔長毛蹺起環局
立法會財務委員會前日戲劇性通過由人民力量陳偉業提出嘅中止待續議案，令環境局諗住透過興建廚餘回收中心減少廢物嘅如意算盤打唔響，要等十月財委會復會後再嚟過。呢個議案可獲通過，其實都有啲內情，主要係民建聯（建仔）唔肯投反對票，有人仲話，事發前見到建仔嘅陳克勤拉社民連梁國雄（長毛）出會議室「密斟」，唔通克勤門前頂頭槌，破壞環境局嘅原有部署？
設計圖片
據聞，喺財委會表決中止待續議案前夕，克勤突然拉咗長毛出去，叫佢唔好要求記名表決，否則建仔惟有要投反對票。最後喺投票時，人民力量、民主黨和工聯會舉手支持，工黨、公共專業聯盟同謝偉銓反對，民記幾個成員就坐喺度冇投票，令議案僅以兩票之差獲得通過。雖然環境局局長黃錦星同政治助理區詠芷夜晚再喺立法會調查「死因」，又周圍問民記議員點解唔支持，但仍然問唔到真正原因。
不過，聽聞建仔之所以對係咪興建廚餘回收中心嘅態度模棱兩可，係因為政府幾年前大力鼓勵業界搞回收工業，正當業界發展漸上軌道，環境局突然之間又話要斥資十五億元興建廚餘回收中心，擺明就係「與民爭利」。建仔擔心得失業界，又唔敢唔支持政府，如果要佢哋投支持票，分分鐘會有好多手尾跟，所以通過中止待續就正中佢哋下懷，令佢哋唔使表態。
話唔係傾廚餘中心喎
克勤回應話，既然廚餘回收中心有爭議，該黨覺得不如再討論吓先作決定，所以決定棄權唔投票。至於佢當時同長毛傾咗啲乜，佢就話唔關廚餘回收中心事喎。都話波係圓嘅，乜都有可能，依家建仔都可以同長毛有密偈傾，信啦？
