世盃估波神獸終極一戰「保羅二世」浣熊家族齊撐德國
神獸「保羅」有接班人！德國八爪魚「神獸保羅」於上屆世盃成為「星中之星」，預測賽果8戰全中搶盡風頭，「去世」後更獲德國奧柏侯森水族館建立雕像紀念，雖然之後有大批神獸湧現，但命中率仍難與「保羅」相提並論，惟近日奧柏侯森水族館再有八爪魚打着「保羅二世」旗號作推介，兼且睇好「日耳曼兵團」可順利捧盃。
浣熊先食阿根廷提子
奧柏侯森水族館上周五向外界介紹終極神獸─Kleiner，牠打着「保羅二世」的旗號為今屆世盃決賽「德國 Vs 阿根廷」之戰作預測，Kleiner爬入貼有德國國旗的盒子「開餐」力撐祖家，且看能否不負「保羅」盛名，順利貼中為德國帶來勝利。
除「保羅二世」之外，德國「浣熊家族」又再出手，早前牠們已貼中德國擊敗法國及巴西，今次工作人員提供分別印有德國及阿根廷國旗、裝滿提子乾的紙袋，掛在繩上讓1大9細的「浣熊家族」選擇。結果眾浣熊先向阿根廷的一袋埋手掏空內裏食物，令貼上德國旗的一袋可於繩上維持較久，與「保羅二世」齊齊睇好「日耳曼兵團」可以捧盃。
