政壇：搞搞政：周一鑊四圍點火頭平機會陰謀圖擴權
「翻閹」做平等機會委員會（平機會）主席嘅「廢官」、食物及衞生局前局長周一嶽（周一鑊）又有新搞作，今次佢就借前平機會主席林煥光離任前話研究嘅《歧視條例》檢討公眾諮詢來四圍點火頭，又辣新移民、又辣個人遊，連性小眾人士同新界原居民都辣埋，仲話要研究喺香港設立人權委員會添！眾所周知，周一鑊在任局長時已四圍「打毒針」，今次又抬出毒針，究竟佢係想借檢討之機擴權自立為王？抑或係有陰謀要反控政府呢？
設計圖片及對白
周一鑊尋日介紹由即日起推出，為期三個月嘅《歧視條例》檢討公眾諮詢文件，主要係檢討將四條歧視條例，包括《種族歧視條例》、《性別歧視條例》、《殘疾歧視條例》同《家庭崗位歧視條例》合而為一，確保本港法例能持續有效保障基本人權。就改革平機會嘅職責同權力，佢連係咪應喺香港設立「人權委員會」都講埋，又問應唔應該考慮改革或廢除《新界條例》同丁屋政策。一連串檢討，咪即係以後港府唔批准居港未滿七年嘅新移民申領公屋就涉歧視？保障「事實婚姻」咪即係為同性平權開先例？周一鑊話，香港嘅新移民福利制度有一定原則，如果係香港人就應該被一視同仁，又話人權委員會係世界趨勢。
利用肥彭遺毒搞事
其實我哋之前都講過平機會呢啲機構表面處理申訴，但事實喺過往挑起咗更多官司同糾紛，同私隱專員公署一樣，都係末代港督「肥彭」彭定康製造出嚟打壓異己嘅產物。而周一鑊今次周圍點火頭都唔係新鮮事，事關佢都有前科搞過《東方報業集團》，佢時任食物及衞生局局長時，就利用《不良醫藥廣告條例》針對同打壓過《東方》，今次佢利用平機會借屍還魂，又唔知有咩陰謀喇。不過，《東方》身經百戰，無論牛鬼蛇神點樣攻擊，我哋都唔會驚嘅！
