政壇：副局馬紹祥 落區即捱轟
新官上場，挑戰多多。發展局肩負搵地起樓大計，副局長馬紹祥尋日落西貢區區議會，向議員推銷區內未來五年改劃十二幅土地用途嘅計劃，呢個計劃都唔嘢少，其中十幅諗住起公營房屋，其餘兩幅發展私樓，如果成個計劃可以落實，估計可提供大約二萬五千個單位，弊在馬紹祥出師不利，畀區議員怒轟準備不足，既無投影片輔助解說，又欠缺地皮嘅詳細資料，總之，反應唔好喇。
馬紹祥落西貢區議會介紹搵地起樓嘅大計，但被區議員炮轟準備不足。
馬紹祥解釋，佢哋唔係準備不足，只係為咗及早進行諮詢，率先同區議員公布具潛力發展嘅土地名單，日後有具體規劃，佢哋會再諮詢區議會，未來仲打算帶議員做實地考察添。
不過，講到地區問題同規劃，區議會仲係零舍緊張，規劃署署長凌嘉勤尋日都先後去西貢區議會同黃大仙區議會介紹工作，西貢區議員要求改善交通擠塞問題，話區內泊車位同休憩用地不足、港鐵將軍澳線載客量又已「爆棚」，好難負荷新增人口。而黃大仙區議員就關注區內欠缺全科醫院，要求喺區內引入急症室服務。
