政壇：立會儲備投資水皮

聽聞立法會四大投資高手議員都有畀心水意見，譬如做開證券嘅張華峰、商界議員梁君彥等，但結果都跑輸大市，原因何在呢?

立法會儲備嘅投資策略全靠旗下嘅投資顧問小組畀意見，小組成員除咗上述嘅張、梁兩人外，仲有保險界陳健波同金融界吳亮星。照計呢四位議員收盡股壇最新消息，八盡政經金融界，理應幫立法會賺到笑噃，但有小組成員解釋，以佢哋眼光，如果用自己錢嚟投資，肯定唔止賺咁少，但佢哋用緊納稅人嘅錢，就一定要謹慎保守，否則一有差池就好難交代。

嚟緊仲有大把血出

由於保守策略行先，一億元儲備原來有近八成用喺定期、債券等低風險投資工具，股票只係佔兩成。有成員仲話，佢哋都認為立法會可以進取啲，增加股票投資比例，但可惜佢哋四位只係負責畀意見，最終決定依然係立法會話事。

成年投資收益只得二百幾萬已經算少，點知轉個頭已經因為保安問題無咗一成。嚟緊仲有唔少使錢項目，譬如立法會法律顧問馬耀添明年退休，開始要搞公開招聘，目的係希望年底前請到合適人選，等兩人有幾個月交接期。睇怕立法會投資小組今年嘅投資策略可能要進取啲，否則分分鐘蝕錢都似。