官僚吹水唔抹嘴 拓土又煲無米粥

呢，陳茂波上次落區被人狙擊，搞到狼狽不堪，今次佢學乖咗嘞，化身鍵盤戰士，撰文回應政府被指刻意隱瞞「綠化地帶」檢討方案嘅質疑。佢話喎，當局嘅檢討工作一直公開透明，循序漸進，唔存在所謂「盲搶綠化地帶」嘅事喎。佢仲話涉及改建房屋嘅「綠化地帶」大約七十幅，總面積一百五十公頃，預料可提供大約八萬九千個房屋單位，其中七成將會係公屋。對於外界批評改建可能需要大量伐樹，佢就誓神劈願咁保證，當局會盡量保存、搬遷具保育價值嘅樹木，或者重新種植樹木，盡量減少對環境嘅影響咁話。

以改劃少量綠化地帶為代價，解決部分房屋問題，聽落都有得諗喎。家陣房屋問題愈演愈烈，望樓興嘆嘅無殼蝸牛有劏房住都唔算係最慘，焗住棲身隨時熱死人嘅貨櫃先至係可悲，所以咯喎，任何有助改善居住問題嘅建議都係值得認真考慮o架。問題係，港府拓土建屋計劃唔少，但到頭來冇一項落實，好似發展新界東北吖，填海造地吖，發展大嶼山吖，見縫插針吖，唔係碰壁就係吹水，寸土必爭淪為寸步難行。家陣話要改劃綠化地帶喎，咪一樣係阻力重重，最後又係煲無米粥嘅咋。

話時話，今屆政府上台之初，擺出一副有所作為嘅姿態，仲宣布未來十年建造四十七萬個房屋單位嘅宏大計劃添，可惜吖，希望愈大，失望愈大，兩年過去，房屋問題唔單止冇絲毫改善，反而不斷惡化。上台頭一年，房價最少漲咗一成五至兩成，第二年因大量辣招推出，樓市冷卻，成交萎縮。之不過咁，最辣嘅招數都會有失效嘅時候，連財爺鬍鬚曾都承認，今年五月份起樓市又掉頭上升。其實，樓市反彈一啲唔出奇，事關以行政手段遏抑樓市始終係治標不治本，作用只係為政府拓土建屋爭取時間。事實證明，政府拓土建屋已經係黔驢技窮，房屋大計一味吹水，樓市又點能唔升呢？

所以話，港產官僚講就天下無敵，做就有心無力，社會只能不斷沉淪。不過咁，對陳茂波來講，房屋問題繼續惡化未必係壞事，可能係夢寐以求嘅好事添，事關佢冇嘢叻，最叻做劏房生意同囤地發財，就算佢將來「戰死」官場，做番平民，最多咪改回老本行，重做「囤地波」或者「劏房波」甚至「貨櫃波」囉！