城中鏡：黃傑龍想當年 會考前發噩夢
中學文憑試（DSE）下周一放榜，有商場就同團體合作提供打氣減壓加油站，為即將放榜嘅考生打打氣，紓緩佢哋緊張嘅情緒。叙福樓集團執行董事Simon黃傑龍日前出席商場活動時，就同考生分享佢當年應考經歷，仲自爆臨考前壓力大到頻頻發噩夢，有次仲夢見考英文科時，揭開考卷竟然變咗做數學科，對一個考生嚟講應該都幾驚嚇。
黃傑龍當年會考時頻頻發噩夢，考英文變咗考數學。
自言會考時畀好大壓力自己嘅Simon話，面對逆境有「上、中、下」三種唔同對策，下策可能係食煙、飲酒等消極又無助改善狀況嘅方法，中策就係出去玩放鬆心情，上策就係做好兩手準備，迎接挑戰。佢形容人生就好似打機咁，難度愈高先愈好玩，好似DSE成績咁，既然係無法改變嘅結果，就應該去計劃好之後點樣應對。
Simon仲講起學生時代嘅升學夢。佢話父母一心想佢做醫生，但佢一見到血就暈，所以做唔成。而佢就對工程比較有興趣，但最後佢竟然機緣巧合下做咗飲食業，所以只要心態積極正面，真係條條大路通羅馬。
