城中鏡：哥頓太太情迷二世古
合和主席「哥頓」胡應湘同太太胡郭秀萍經常四出滑雪，去過美國、加拿大同歐洲等世界各地嘅滑雪勝地體驗，但哥頓太太就始終鍾情日本北海道嘅二世古喇，仲斥資喺當地開埋精品酒店，方便自己同啲朋友住添！佢話喺日本滑雪嘅好處係同香港時差唔大，又可以食到好多啱香港人口味嘅各國美食，相反喺外國滑完雪想食亞洲菜就困難好多喇！
胡應湘（左）同太太胡郭秀萍（右），將會擴建位於二世古嘅精品酒店。
酒店附近一間米芝蓮食肆嘅齊藤師傅，專程來港製作胡應湘最愛嘅牛肉串燒畀嘉賓食。
胡太邀得當地另一位名廚加藤師傅出山，喺佢哋酒店製作地道壽司。
哥頓太太話滑雪嘅好處係，可以揀啱適合自己程度嘅滑雪道嚟玩，唔想運動量咁大，好似佢同老公咁，就可以揀平坦一啲嘅，一樣可以享受到滑雪嗰種快感。
開酒店好過買間屋
二世古有唔同難度嘅滑雪場，仲有過百間食肆，胡太對當地食材、尤其各種刺身非常着迷，諗住喺酒店內劃一個位置經營食肆，售賣當地嘅平民式咖喱飯，保留地道特色。而老公哥頓最愛就係酒店附近一間米芝蓮食肆嘅牛肉串燒，佢同嗰個師傅好熟絡，今次仲帶埋佢過嚟香港，即席燒畀嘉賓食。
哥頓太太一向投資有道，但佢之所以決定喺二世古開酒店，最初原來係出於個人需求。話說佢同家人經常去當地滑雪，好鍾意當地嘅環境同食物，唯獨係對住宿方面唔太滿意，因為當地大部分酒店同旅館，都起碼有二十年以上歷史，設施比較陳舊。有次佢同老公講，如果喺當地有間屋就好喇，不過諗諗吓，自己一年先去幾次，間屋冇人住時又要搵人打理，不如索性起大啲做酒店，招呼朋友之餘又可做生意。
適逢滑雪旺季，當地酒店大多一早就爆滿，以今年聖誕檔期為例，佢哋間酒店依家已經冇晒房，難怪嚟緊要進行擴張，加建多一棟六層高酒店，預計明年年尾落成，房間數目增至四十五間。
政壇近期熱論作為名人配偶嘅言行舉止，為人一向好隨和嘅哥頓太太就話無論係乜嘢身份，喺公眾場合講嘢都應該要事先諗過度過，千祈唔好講啲會傷害到別人嘅話，例如佢老公出名心直口快，佢有時都提吓對方。
