政壇：搞搞政：識走位免被捕學民精過學聯
學民思潮同學聯喺今年民陣七一遊行後預演佔中，分別包圍特首辦同埋佔領中環遮打道。最終警方將遮打道嘅示威者清場，五百一十一人被捕，當中大約有八十五人係學生，唔少係學聯領導。
設計圖片及對白
遊行中人話學民當日籌款嗰陣，不停向遊行市民高呼自己會去「公民抗命」。佢哋最後籌得一百三十一萬元，僅僅比「佔領中環」秘書處少八萬元咋，成績係各大政團或民間組織之冠，相反主辦七一遊行嘅民陣同發動佔中預演嘅學聯，就分別只籌到四十三萬元同幾萬蚊，真係差天共地。
到真正「埋牙」佔中時，學聯兌現承諾留守中環遮打道馬路，結果多名要員畀警方抬走拘捕，包括秘書長周永康、副秘書長岑敖暉，同各大專院校嘅學生會代表。
「咁都算公民抗命？」
相反，包括召集人黃之鋒在內嘅學民由於走咗去「佔領」特首辦，而且只佔行人路，不佔馬路，無人被拘捕，有人就質疑「咁都算公民抗命？」「大讚」學民唔單止籌錢叻，「走位」仲叻。
我哋問過學民，發言人周庭話一早解釋咗，佢哋去特首辦係希望向特區政府表達訴求，學聯就想留喺代表敏感地點嘅中環，向中央表達訴求，總之大家都係推動公民提名喎。佢又聲稱冇特別諗過佔行人路定馬路嘅分別，即使當晚佢哋冇佔馬路，警方都有舉旗宣告佢哋喺度非法集會，依家只係暫時未有人被捕。究竟今次係有人眼紅學民籌錢多，定係學民真係公民抗命得把口，讀者自行判斷喇！
