政壇：樓上冧紙皮石 鍾港武焗封舖
尋日中午十二點十五分左右，旺角富榮花園第九座約十五至十六樓嘅一幅外牆，突然冧咗一塊大約一米乘一米嘅紙皮石落嚟，好彩啲碎石咁啱跌喺樓下一個候車處嘅簷篷上，之後先再反彈落行人路，無人受傷。但就累到現場嘅四、五間地舖要暫時封閉，其中一個正正係首先發現呢單意外，仲即刻報警處理嘅油尖旺區議會主席鍾港武嘅議員辦事處。
富榮花園第九座高層外牆冧紙皮石。
紙皮石跌落候車處簷篷再反彈地面，部分碎石散落喺鍾港武議員辦事處門口。
鍾港武話富榮花園樓齡得十幾年，以前都聽過有紙皮石剝落問題，但咁大規模、咁驚險嘅都係第一次，佢會向管業處同有關部門跟進。佢又話事發地點對面有間小學，平日中午會有好多學生行過，好彩依家係暑假，先至無人受傷。因為冧紙皮石位置高，估計要一段時間清理維修，佢間辦事處對出路面可能仲要封閉多一輪，不過佢強調安全第一，話受影響都冇辦法。
