話說「正義聯盟」召集人李偲嫣早前不滿警方同政府對抗反新界東北暴力示威不力,走咗去政府總部絕食,數日後就不適送院被迫放棄。尋日佢又有新搞作,重返政總廣場宣布要成立一個「撐警大聯盟」,喺下個月搞番個「撐警大遊行」,瞓身支持警方對佔中呢啲違法行為嚴正執法,仲順便紀念舊年佢針對爆粗老師林慧思所搞嘅撐警集會一周年。

李偲嫣(右一)揼晒心口,宣布將每年嘅八月四日定為「撐警日」。

李偲嫣話舊年八月四日喺旺角行人專區搞嘅撐警集會,畀大批激進示威者衝擊、抹黑,早就預示香港暴力政治文化抬頭,理性、和平、守法等核心價值被拋棄,語言同肢體暴力不斷升級,擔心香港遲早變做暴力城市,所以決定將每年嘅八月四日定為「撐警日」,又組織咗二十幾個友好團體,組成撐警大聯盟,呼籲支持警隊嘅民間團體加入。

因為八月四日係星期一,唔係好適合搞遊行,佢哋決定提早一日喺八月三日搞遊行,行程包括灣仔警察總部,之後再舉行集會。李偲嫣舊年搞嘅撐警集會,最後搞到一鑊泡被迫腰斬,現場有人被打,事後仲有人被控,希望今次遊行集會唔會又搞成咁啦!

第一手消息請下載on.cc東網iPhone/iPad/Android/Windows Phone Apps