政壇：政改破局 五區公投諗得過

非也、非也！官場中人話，中央對政改一定唔會讓步，講到明普選關乎國家安全，驚選出一個同美國等外國有聯繫嘅特首，到時變成烏克蘭咁話，所以制度一定會有篩選，最多只會放「一人一票」畀香港人；而泛民就話要冇篩選，係人都入得閘選特首。兩邊大纜都扯唔埋，如果咁樣落去，中央寧願一拍兩散。

咁點樣先至可以「破局」？官場中人分析，要畀泛民「下台階」，靠嘅就係五區公投。因為中央發表白皮書前，唔少民調都顯示，有近五至六成市民接受「食住先」，如果泛民五區辭職，遞補機制立咗法，泛民要搵其他人出戰參與補選，名氣未必咁大。

如意算盤唔易打響

由於建制派唔計立會主席有四十二席，只差五席就會過立法會三分之二多數，到時建制派就會有好大誘因，以單一議題「要一人一票定係否決政改」同泛民爭議席。以民意計，分分鐘好多泛民選民想食住先，轉向支持建制，搶到五席就唔使同泛民傾，就算搶到部分議席，泛民都見到龐大民意，到時要轉軚支持政改方案，反對意見就冇咁大嘞。

不過，要打得響呢個如意算盤，首先唔可以淨係辭超級區議員，又要中央認同「公投」嘅合法性，以四年前例子，睇怕都唔係咁容易。