學位忽多忽少 教局添煩添亂
大丈夫能屈能伸就話好啫，若然學額忽多忽少，忽增忽減，咁就得個亂字嘞。呢嗱，隨着中一適齡學童人口持續下跌，多區中學都出現學額過剩嘅問題，殺校潮隨時重演。反觀小學學位就因為雙非大軍壓境而爭崩頭，有位冇人讀，有人冇位讀，怎一個亂字了得。
唔係太一叮亂噏o架。呢，有數得計，新學年升中派位人數再跌二千八百人至五萬一千二百人，整體剩餘學額較去年再增一千三百個。保守估計，七月升中放榜後，全港中一最少縮減三十班，認真誇張，難怪有中學校長形容收生形勢空前嚴峻喇。
咁仲唔止吖，目前全港只有北區及觀塘區能夠達到零剩餘學額，其餘各區都出現學額過剩。重災區首推屯門，剩餘學額多達九百個，據悉區內有九間學校屬「高危」，只開三班中一都未必收足學生，隨時殺校都有之。至於名校林立嘅東區亦唔好得幾多，剩餘學額多達六百五十個；沙田區亦不遑多讓，足足多出五百五十個學額，問你怕未。
為咗自救，各區中學校長都達成所謂「君子協議」，謝絕叩門學生。屯門區更加設立「統一協調中心」，各校會公布每日收生數字，再向教育局匯報，必要時會要求教育局轉介新移民或非華裔學生畀收生不足嘅學校。正如該區中學校長會主席話齋，唔想區內有學校被殺，惟有扭盡六壬，出盡法寶嘞。
最荒謬嘅係，這邊廂中學學額過剩，那邊廂小學學位供不應求，而北區問題最嚴重。嗱，早前小學派位放榜，因為跨境學童大增，搞到北區學額嚴重短缺，本地同雙非家長都怨聲載道。面對亂象，當局一味頭痛醫頭，增設所謂「跨境學童專用校網」，又要求多間小學開設「大肚班」，加收學生。問題係，港府前年開始叫停雙非，跨境學童人數預料會喺幾年後大幅回落，咁搞法，小學學位係就係唔使爭崩頭，仲分分鐘過剩添，但中學就慘嘞，隨時一位難求，到時要求中學生跨區返學，咪一樣又係怨聲四起。
即係咁，今時今日嘅教育政策亂七八糟，一時學額不足，一時學額過剩，校方一時餓死，一時又撐死，學生同家長無所適從，疲於奔命。不過講到尾，呢啲都係拜前朝貪曾政府所賜，如果唔係貪曾好大喜功，大搞醫療及教育產業，對雙非孕婦中門大開，又點會搞成咁吖。
話時話，雙非問題固然係導火線，現屆政府都有責任o架，如果未雨綢繆，早啲諗計，點會有今日嘅亂象？叮！
