七一後留守遮打道被警方清場拘捕的五百一十一人當中，有超過八十個大學生，涵括香港八大院校及教育學院。

直至今日，除港大鬼佬新校長事前話會向被捕學生提供協助外，未見任何一個黃皮膚的同胞校長出來直接回應過，怪不得，現各大院校的「民主牆」壁報板上，全是「尋人啟事」，尋找「失蹤」的校長、校董、學校管理層，及一些龜縮的導師。究竟，呢棚人「竄」晒去邊呢？驚乜春呢？

與此同時，又有超過四十多位學者公開聯署支持學生的「公民抗命」，因學生是為社會公義，而非個人得益。

一九一九年五四運動，學生上街，火燒趙家樓，軍警鎮壓，逮捕了三十二人。北京大學校長蔡元培立即瞓身營救，佢話：有乜事，我先辭職，但家陣，首要係營救學生。並向北洋軍閥政府說：「被捕學生的安全，是我的事，一切由我負責。」為了救學生，蔡元培挺身站在最前線，發動全國工商界罷工罷市（嗱！睇清楚呀！係「全國工商界」都撐學生o架！），大總統徐世昌不得不下令釋放全部學生。

今天香港的大學校長，在蔡元培跟前，仲似個人嗎？接任校長一職前，喺（佢哋嘅）阿爺面前交了個甚麼心，敢向我們交個代嗎？

中共專權統治，重視意識形態的控制，大學是思想的啟蒙基地，如斯關鍵陣地，怎會輕放給「非自己友」掌管呢？所以，凡見到那些愛陪學生睇波扮friend的公關show校長，就特別作嘔，但見那些靠「涼粉」身份上位的，就更乞我憎！

當大學公然將學生當貨咁嗌價出售時，仲信呢啲校長是個有德行嘅「知識分子」？有事，唔救你，一早已經預咗o架啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps