政壇：搞搞政：白鴿「硬起來」擬提早佔中
由港大法律系副教授戴耀廷提出，透過「佔領中環」、公民抗命，迫使中央及特區政府就二○一六同一七年政改方案讓步，本來已經好激。但當前香港局勢係「沒有最激、只有更激」，繼學聯搶閘於七一舉行佔中預演，並預告會喺八月底再度佔中後，連向來立場相對溫和、強調「和理非非」（和平、理性、非暴力、非粗口）嘅白鴿黨，尋日亦「硬起來」，揚言最快會喺呢個月就「搶胡」提早佔中，真係唔聲唔聲，嚇你一驚。
設計圖片及對白
白鴿黨主席劉慧卿尋日出席一個論壇時，就突然自爆該黨最快會喺本月內、或最遲喺八月份提早佔中。卿姐指出，佔中運動唔係只搞一次，而係一波接一波嘅抗爭，由於政府將於本月內公布政改首階段諮詢報告，全國人大常委會亦預計會喺下月底就香港政改設下框架，如果到時中港政府既否決公民提名同政黨提名，又「一錘定音」攞出唔符合國際標準嘅普選方案，佢哋就算未必入到「四波」，都會入定「三波」！佢又透露，白鴿黨百多名簽咗佔中意向書嘅黨員、議員同社區主任等，聽晚會召開特別黨內大會，商討提早佔中大計，之後佢哋會約見佔中三子同學聯等團體，傾吓大家點樣配合。
自稱並非「鬥激」
有白鴿黨中人解釋，政府對佔中公投以至七一遊行都不為所動，上周五仲首次拘捕主辦七一遊行嘅民陣多名成員，畀人感覺係「摟打格」，所以該黨就喺早兩日決定召開有關會議，準備提早佔中。佢哋自言並非「鬥激」，亦無意截任何人嘅胡，最後點做同幾時做，都會尊重番佔中三子嘅意願。
佔中發起人陳健民就重申，依家仲未係佔中嘅成熟時機，但如果政府諮詢報告「發癲」，講到明冇公民提名，又或者人大常委會喺八月底作出強硬決定，堅持「機構提名」同「全票制」等，令香港選民冇可能有真正選擇，佔中屆時就可能一觸即發。
