今年七一有五十一萬人上街遊行,而香港專上學生聯會(學聯)同學民思潮喺遊行後預演佔領中環,好多人留守喺遮打道唔肯走,最終警方清場,仲拘捕咗五百一十一名示威者,當中包括咗幾個泛民主派嘅立法會議員,其餘示威者大部分遭警方發出警告信。

設計圖片及對白

其實有個別嘅政黨喺早前都搞過啲講座,教啲黨員喺參與佔中行動嘅時候,應該點樣應對。之不過,學聯尋日就特登為被捕嘅市民舉辦行動後續支援分享會,事前仲發出採訪通知邀請各大傳媒機構採訪,不過佢哋喺分享會舉行前,突然改變初衷,決定將活動改為閉門進行,唔畀傳媒企喺活動外面影相,甚至出動保安要求傳媒離開,莫非示威者敢預演佔中但唔敢見傳媒?

稱保護當日被捕人士私隱

呢個分享會原定下午二時許舉行,由原定開放予傳媒採訪改為閉門進行,底因係有人擔心警方會秋後算帳,但尋日現場所見,數十名出席分享會嘅市民,其實進出分享會都表現大方,未見特別左閃右避同迴避鏡頭。

學聯前秘書長陳樹暉解釋,分享會閉門舉行嘅出發點,係希望保護當日被捕人士私隱,又話今日下午會召開記者會總結分享經驗,同時邀請願意受訪嘅示威者出席接受傳媒訪問。

查實傳媒當日喺警方清場拘捕行動時,已經影過示威者嘅樣貌,學聯今次以為免示威者擔心為由改為閉門進行分享會,呢個理由好似有啲牽強喎!

第一手消息請下載on.cc東網iPhone/iPad/Android/Windows Phone Apps