上樑不正下樑歪 廉署自身也難保

正所謂，一粒老鼠屎搞壞一鍋粥。前廉政專員湯顯明涉貪被查，害到廉署形象插水，市民信心盡失，如果再交唔出反腐成績單，反而不斷爆出醜聞，廉署招牌摺埋都得咯。

嗱，廉政公署向立法會提交年報顯示，舊年共接獲二千六百幾宗涉及貪污嘅投訴，話就話按年下跌三成三，但關於廉署及其人員嘅投訴就有三十一宗，涉及八十六個項目，包括廉署人員行為不當、疏忽職守、濫用權力同工作程序不足等，調查後證實十二宗個案屬實，比前年勁升五倍，都咪話唔得人驚。其中兩宗由本報揭發，再次顯示傳媒第四權監督嘅威力。

廉署作為反腐倡廉利器，除咗依法辦事，打擊貪污，自己以身作則，行得正企得正更加重要。家陣本身一年居然孭咗幾十宗投訴，自身難保，試問點樣打擊貪污？又點樣令市民恢復對廉署嘅信心？

所以話，上樑不正下樑歪，貪湯任內將廉署當正私家會所，貪威識食，濫權徇私，豪花公帑胡亂揮霍，做大嘅其身不正，又食又拎，下面有樣學樣，烏煙瘴氣，又有乜出奇吖。

即係咁，廉署舊年接獲二千六百幾宗涉及貪污嘅投訴，表面上數字少咗，查實只不過係假象咋。早排廉署做嘅民調顯示，八成受訪者願意舉報貪污，證明市民對貪污已忍無可忍。其實，市民對腐敗警覺性高咗，願意挺身舉報嘅人多咗，「居功至偉」嘅唔係廉署，而係廉署前一哥貪湯，同埋搞到香港廉政聲譽掃地嘅曾蔭權爵士。試諗吓，如果唔係煲呔曾貪遍省港澳、歎盡海陸空，點會搞到天怒人怨？如果唔係貪湯假公濟私，又點會搞到本港廉潔指數跌跌不休？

開講有話，百年養不足，一日毀有餘。廉潔及法治係港人引以為傲嘅核心價值，香港辛辛苦苦建立嘅形象及聲譽，喺貪曾集團一再摧殘下已經蕩然無存，講起實在可悲。

計太一叮話齋，喺邊度跌倒，喺邊度起身，要重新建立廉潔形象，要挽回市民信心，就要從廉署做起，反腐除貪絕對唔可以手軟，尤其係現任廉政專員白韞六，更應該撥亂反正，重錘出擊，唔可以放過絕代雙貪o架。話時話，貪曾貪湯案查咗咁耐，究竟仲要拖到幾時呢？幾時至有結果呢？內地反腐風暴愈吹愈烈，老虎打完一隻又一隻，反而香港無聲無息，簡直匪夷所思，叮！