前日，香港每年一度的「七一大遊行」，時晴時雨，遊行人汗水淚水濕了又亁、乾了又濕的行足五、六小時，才由起點銅鑼灣去到終點中環。

是次遊行人數，以我二十多年在香港的遊行經歷和資料記錄，敢說是自一九八九年五月二十八日的一百五十萬人大遊行之後，最多的一次，絕對比二○○三年的五十萬人多，肯定更勝二○○四年的「五十三萬」。

好嘞！今劑七一大遊行的參加者有幾多呢？以警方最早報數，話「由維園出發者有九萬二千人」，跟住，又說「高峰時有九萬八千六百人」；隨之，港大民研計到「有十五萬四千至十七萬二千之間」，相差成十個巴仙啫！而主辦單位民陣報數「保守估計係五十一萬」；最後，港大學者葉兆輝宣稱「有十二萬二千人」。

幾個點算人數單位的調查方法，各說各話，聽來言之有理，但卻數字年年都差距不一，原因莫名。

我不懂核查方法，沒資格搭嘴，但從警方和民陣的回應，便見謊言和偽語。差人說「九萬二」係由維園出發，即不是全部所有參與者啦！因近年，警方用盡手段，阻撓市民入維園內，所以，不少人是中途插入的，警方便順理成章，撳低遊行人數。嗱！不超過「十萬」這關口數字，是給「阿爺」睇的！話之你香港人媽媽聲。但卻引出另外一個「謊言問題」，就係支聯會年年的燭光晚會坐滿六個維園足球場時，都公布話有二十萬人，今劑七一遊行又企滿六個球場，咁點解只得九萬二呢？邊個講大話呢？

民陣話「保守估計」有五十一萬，最終無更改數字，即先買了保險，後「確認」！這是一種「語言偽術」，被廢柴政府教壞了！但全人類都看到歷來最多參加者，咁以前啲數係假嘅？好古怪！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps