政壇：社民連吸金力大增 長毛獄中等收錢
啱啱過去嘅七一遊行錄得近年最高紀錄嘅五十一萬人，連帶唔少政黨籌款豬籠入水。有「丐幫」之稱嘅社民連每次遊行都變成佢哋嘅「提款機」，但偏偏主席「長毛」梁國雄被判監喺今個星期六先出獄，無得喺街站做生招牌。正當大家以為籌款能力大減時，佢哋就公布前日合共籌到九十三萬元，吸金能力冠絕一眾政黨，長毛真係喺獄中等收錢。
「長毛」梁國雄被判監喺今個星期六先出獄，無得喺街站做生招牌。
社民連喺成個遊行街站乜都無賣，淨係掛住一幅印有長毛變短毛，兼扣住手銬嘅特大海報。副主席吳文遠話原先都以為無咗長毛，籌款收入會少咗一截，點知最後竟然仲比往年六十九萬元多出一大截。至於佔中街站就籌得一百三十九萬元，比往年多出接近六十萬元，學民思潮亦籌得一百三十一萬元。
