政壇：星爺爛攤搵人接 林大輝陳健波大熱
話說立法會財務委員會足足討論咗七次，最終先勉強通過新界東北規劃前期撥款。反對團體多次包圍立會，仲兩度發起衝擊。擔任財委會主席嘅金融界議員「星爺」吳亮星，不時被人質疑佢唔熟書，被班泛民主派議員用議事規則玩到陀陀擰。雖然星爺只需要坐多兩個星期就落任，但根據建制派協調機制，最後一個立法年度都係由佢做番主席。不過，近日有傳星爺意興闌珊，亦傳出換人呼聲。
林大輝係接替吳亮星做財委會主席嘅其中一個人選。（資料圖片）
有建制中人話，星爺經過今次處理新界東北撥款嘅重創，最後一個立法年度會否繼續主持財委會呢個爛攤子實在好難講，所以依家開始搵人接棒都唔算遲。睇番現時幾個關鍵嘅主席位都由有政黨背景嘅議員出任，如果財委會主席由獨立議員擔任，形象似乎會好啲。好似保險界陳健波同工業界林大輝都係資深嘅建制派議員，兩個都有機會跑出，陳健波近期多次批評激進泛民「拉布」，而大輝就曾經向星爺教路。
不過，做主席最緊要都係夠硬淨，硬淨得嚟又要言之有物，否則難以服眾，同埋要睇清楚本身有冇涉嫌利益衝突，唔係被泛民玩程序都有排玩。
