三年上樓大隻講 無殼蝸牛倍徬徨
安得廣廈千萬間，大庇天下寒士俱歡顏？今時今日嘅香港，覓地建屋舉步維艱，公屋輪候冊大排長龍，所謂「三年上樓」根本係大隻講。香江寒士望樓興嘆，隨時等到死都未上到樓，直情係悲慘世界嘅現實版。
唔係太一叮誇張o架。立法會房屋事務委員會日前舉行公聽會，出席團體狂轟當局嘅「三年上樓」承諾假大空，存心誤導公眾，實情係唔少四至六人家庭輪候七年都未上到樓。至於十二萬非長者單身申請人咯喎，每年僅獲當局撥出二千個單位分配，等足六十年都未必有份上樓。正如有住喺劏房嘅患癌長者哭訴，申請公屋多年都冇下文，擔心自己時日無多，有樓冇命享，你話係咪聞者心酸吖！
其實，三年上樓根本係欺人之談。早前審計報告踢爆，房屋署為咗達到三年上樓承諾，不惜巧立名目，將輪候時間較短嘅長者單身人士，歸入一般家庭申請類別，以求縮短平均輪候時間。當局為咗粉飾櫥窗，連篤數都做得出，無殼蝸牛唔嬲就假。
事實勝於雄辯，家陣公屋輪候冊宗數已逼近二十五萬大關，但港府承認未來十年嘅公屋供應量實際只有十七萬九千個，遠低於長策會訂下興建二十萬個公屋單位嘅目標。供不應求嘅情況持續惡化，有乜可能三年上到樓吖，唔怪得有立法會議員批評，港府根本係玩弄語言偽術嘞。
講真，要達成十年興建二十萬公屋嘅目標，最少要額外開拓三十八公頃用地，喺社會愈來愈政治化嘅今日，要完成任務仲難過登天。好似新界東北發展計劃咁吖，前期撥款係就係通過咗，但引發嘅爭議極大，民怨極深，將來係咪可以順利收地都成疑問，加上遠水難救近火，根本無助解決眼前嘅房屋問題。
最令人莫名其妙嘅係，港府聲稱房屋問題係施政「重中之重」，一邊高喊「寸土必爭」，一邊浪費土地資源，唔係起埋啲單幢牙籤樓，就係縱容富豪會所繼續霸佔土地。當局嫌貧愛富，厚此薄彼，一味叫市民犧牲小我完成大我，唔怪得咁多人反對新界東北發展計劃喇。當局仲話要發展大嶼山喎，又要填海造地喎，睇怕又係無米粥咋。
咁講啦，港府對房屋問題束手無策，根子固然係施政無能，不過講句公道話，社會一日到黑嘈喧巴閉，有人為反而反，唔通唔使負上責任咩？試諗吓，呢度唔准發展，嗰度唔畀起樓，咁地從何來？屋從何來？家陣人人掛住政治爭拗，根本無人關心民生經濟問題，咁搞法，香港只有死路一條嘅咋，叮！
