城中鏡：大埔踢番甲組李宗德忙埋班
世界盃賽事愈嚟愈緊張，唔少城中名人都不惜捱夜睇波，身兼和富大埔足球隊會長嘅公民教育委員會主席李宗德都唔例外，但佢大呻依家政局混亂，令佢睇波心情大打折扣喎！我哋有日下晝喺金鐘中信大廈遇到李宗德，佢同幾位扶輪社嘅朋友喺一間快餐店傾偈，期間愁眉深鎖。不過，之後我哋同佢提起和富大埔，佢即時生猛晒，事關和富大埔重返甲組，唔止球迷振奮，佢都直言好開心。
李宗德積極為和富大埔重返甲組埋班，期望組建一支勁旅回報球迷。
下季踢好波回報球迷
為準備和富大埔下季重返甲組，李宗德話依家重新組緊班，希望組建一支包含青年軍同甲組球員嘅勁旅，下季踢好啲回報球迷。佢咁鍾意足球，梗係唔會錯過世界盃賽事啦，但近排香港政局適逢多事之秋，其中包括反對新界東北發展嘅示威者衝擊立法會，難怪李宗德話睇波心情大受影響喇！
