城中鏡：陳恒鑌呻迪欣湖難泊車
雖然立法會財務委員會早前喺爭議下，通過咗新界東北前期撥款申請建議，但唔代表「拉布」戰結束，反而係戰線擴大，激進泛民主派嘅議員將喺立法會大會、財委會、工務小組等全線發動「拉布」戰，建制派議員真係要嚴防先得。
陳恒鑌同太太及囡囡到迪欣湖野餐，享天倫樂。（互聯網圖片）
喺拉布戰持續下，建制派議員陳恒鑌（Ben）就偷得浮生半日閒，喺日前一家三口去迪欣湖野餐，享受天倫之樂。不過，當日阿Ben開車去到迪欣湖，先至發覺現場冇晒車位，等咗成一、兩個鐘先入到去。阿Ben就投訴話迪欣湖附近嘅交通接駁麻麻地，唔少市民都焗住開車去嗰度，估計當初迪欣湖開放時，可能低估咗市民對車位嘅需求，希望有關方面考慮喺附近搵地方，增加泊車位喎！
