城中鏡：廠商會競駿同樂
中華廠商聯合會（廠商會）揀咗尋日七一搞八十周年紀念盃賽，而且仲派咗馬匹出賽添，一班會董同青委成員齊齊捧場打氣，有成員仲落注支持，好似會董Louisa羅台秦就中咗一條單Ｔ，獎金唔多但勝在夠開心。一班活力十足嘅年輕成員亦有新搞作，嚟緊會參加慈善越野馬拉松，八個小時內行二十六公里，少啲體力都唔掂。
廠商會女成員個個才貌雙全，包括Joyce（前排左起）、王詩雅、Vicki、Iris、劉子芸（後排左起）、Vence及林蘭詩。
廠商會主席施榮懷（右）與太太（左）同兒子施仲樂一齊出席八十周年紀念盃賽。
黃楚權（左起）、莊偉茵、陳國民、史立德同太太史顏景蓮日日喺WhatsApp群組內牙骹戰。
一班紮紮跳嘅成員諗慶祝活動時，亦不忘慈善。常務會董李慧芬透露，佢哋十一月將會參加苗圃行動嘅二十六公里慈善越野馬拉松，目前已知有青委副主席王詩雅、顏明秀等約二十位成員，共分成六組參加。佢哋仲有個委員胡子岐係「魔鬼教練」，負責鞭策佢哋練習，而青委副主席劉子芸，雖然腳有舊患參加唔到，但都會負責補給支援。
WhatsApp開群組講波經
雖然同場一班前輩體力未必咁旺盛，但對世界盃一樣狂熱，仲開咗個WhatsApp群組「吹波台」，競猜決賽對壘隊伍，係歐洲定係南美國家隊之爭。中電企業發展總裁Quince莊偉茵同老公黃楚權亦係個群組成員，佢哋同廠商會常務會董史立德一樣，估計決賽兩隊都係南美國家。點知Quince畀人寸佢「唔好傻」，話佢平日咁精明，估唔到今次聽晒老公講，對佢好失望咁話喎。
