有入境黑名單咪有囉！全球任何地區，都有拒絕「不受歡迎」外來者的特權㗎啦！唔畀佢入咪唔畀囉！但香港入境處，以至保安局和政府高層總是不敢挺起胸膛，承認有謝客「黑名單」，真有違國際常理！

事實上，每逢香港「政治大時大節」，就會有不少外籍愛港者想親臨參與盛事，皆畀港府踢返老家，而劑劑香港政府發言人皆窒口窒舌，死唔認有做過，好鬼鬼祟！

在中國土壤上，唔畀你入境，你咪好彩囉！唔畀你出境，至仲大劑！嗱！唔係講今時今日的內地「問題人物」呀！而係好普通的小市民……

曾經做義工，探訪老人院，陪那些無依無靠無親人的單身長者過節。聽過一位老婆婆說身世。

老婆婆本是印尼華僑，家境富裕，十四五歲時，被愛國的爸爸，送往他心愛的「祖國」（即大陸）讀書，點知，無幾耐，爆發文革大風暴，當時仍係小妹妹的「千金小姐」，不准離境，跟住，又因佢老爸係外地營商的資本家，出身唔好，無書畀佢讀不特止，仲趕佢去湖南下鄉務農，掘地鋤泥幾年後，還逼她嫁給當地一農民；而她又與家人失去聯繫，咁就無端端由個大家閨秀，變成個鄉下婆。

文革之後，老婆婆與丈夫雙雙偷渡來港，無親無故的捱了一輩子，無兒無女，老伴過身，只剩下她一人了！她曾返過印尼尋親，又因排華，家人卻不知去向。

聽婆婆說心聲，她找到傾訴對象，頗愜意暢快，但我卻慽然傷感。婆婆不必要的苦難，來自一個鬼域的人禍，幾十年過去了！人禍不單止沒消除，反而，更嚴重、更猖獗，中國人幾時至有真正的「人生」自由呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps