公屋上樓無期，有團體怒轟三年上樓承諾有誤導，更有劏房長者戶哭訴，等到上樓都冇命住啦，李衞真係睇唔過眼，一於搵運房局局長炳炳問責。

李衞：又話三年上樓承諾，依家四、五人家庭等七年都未上到樓，承諾冇兌現！

炳炳：冷靜啲，我哋不斷諗緊方法增設公屋。

李衞：得個諗字有咩用？連劏房長者都上唔到樓，唔通真係「等到上樓都冇命住」咩？

炳炳：絕對唔會，放心啦，等吓就有機會……

李衞：等？等一世呀？

炳炳：唔使，好快、好好快、好好好快……

李衞：咁爽快應承，因住下巴輕輕呀！

炳炳：我嘅任期過多幾年都玩完啦，到時市民上唔到樓都唔關我事，係都關下任局長事啦！哈哈哈！

李衞：可怒也，大家一齊同我打佢！

炳炳：#&&^%#@@@!!!

第一手消息請下載on.cc東網iPhone/iPad/Android/Windows Phone Apps