去過台灣嘅特區問責官員一直係少數，例如民政事務局局長曾德成隨佛學團體訪台，而財爺鬍鬚曾都係靠身兼港台經濟文化合作協進會榮譽主席嘅身份先去過台灣，佢哋都係攞正牌訪台嘅，但聽聞問責官員、甚至以官式身份去過台灣嘅常任秘書長等公務員，都被台灣放入「黑名單」，想放假去台灣三兩日都搞到一波三折，事關申請入台證關卡重重。

要預先知會特首辦

據聞，由於香港問責官員唔可以上網申請入台證，去到台灣申請落地簽證仲試過被拒入境，傳聞有人試過因此差少少去唔成旅行，情況搞到好尷尬。

因應上述情況，今屆政府開始將赴台申請常規化，如果官員想用私人理由去台灣旅遊，既要通知所屬政策局局長，負責港台關係嘅政制及內地事務局亦特別預備咗張表格，由該局幫手申請入台證，同時要知會特首辦公室，稱得上係「過五關斬六將」。

記住私人身份前往

據知欲赴台旅遊嘅官員，要喺申請表格填上個人姓名、職級、去台灣嘅時間、目的地等，如果行程期間有機會同當地官員會面，就要預先寫低，跟住局方會決定係咪同意有關申請，然後再畀特首簽署作實。之後嗰啲官員就要帶齊相關文件，親自去金鐘嘅台北經濟文化辦事處申請入台證。

赴台申請表格又講明，如果官員遊台期間，有駐港台灣機構或台灣當局主動聯絡或接觸佢哋，返港後要作出匯報，同時又提醒赴台官員，記得自己係以私人身份去台灣旅遊，除非有授權，否則言行唔代表特區政府。不過，台灣離香港咁近，只係約一個小時機程，所以好多官員都似乎唔怕麻煩，照去可也！

第一手消息請下載on.cc東網iPhone/iPad/Android/Windows Phone Apps