政壇：鄭錦鐘健身谷肌減磅
練大隻、谷胸肌已經唔係後生仔嘅專利，好似保良局前主席Eric鄭錦鐘咁，除咗要減磅外，都秘密操胸肌，平日會喺中環私人健身室約埋私人教練上堂，相當認真。要瘦當然要付出代價啦，Eric話最緊要忍得口，佢近日奉行「食半份」戒條，每樣食物只食半份，又戒吃甜點，半年間瘦咗幾磅。
鄭錦鐘（前）健身消脂減磅，要聘請私人教練指導。
面不紅氣不喘做到呢招雙槓抬腿，唔簡單噃。
講到健身，Eric話呢個習慣維持咗十幾年，每個禮拜練個半鐘，風雨不改。舊年做保良局主席後忙到飛起，被迫破例偷懶。點知因為郁動少，加上應酬多，一年間肥咗幾磅，所以卸任後決心減磅，近日急Call私人教練上堂。佢又拍拍胸肌，露出滿意笑容咁話：「以前身形好瘦冇乜肌肉，苦練一輪後終於有成績。」不過，如果要練到六舊腹肌，佢就話咪搞嘞！
