政壇：陳維安側側膊回答學生
喺啱啱過去嘅禮拜日，「第七屆香港模擬立法會」第一個工作坊喺立法會大樓教育活動室舉行，立法會秘書長Kenneth陳維安分兩次親自接待百幾名高中同學，據聞同學們嘅問題好尖銳，而且好貼近社會熱門議題，包括功能界別存廢、分組點票、立會保安安排等。之後Kenneth喺社交網站留言話，佢無提供標準答案，莫非被同學仔問到口啞啞？
陳維安親自接待百多名高中學生，據聞同學們嘅提問都好尖銳。（互聯網圖片）
身為模擬立法會活動創辦人、青年事務委員會委員范凱傑，當日有份參加嗰個工作坊，佢話Kenneth無畀同學仔問到口啞啞，只係用持平角度去回答提問，例如有同學問到最近有委員會主席主持會議時被指違反議事規則，會有乜制衡機制？
問功能界別答歷史
據講，Kenneth當時話每個主席主持會議風格唔同，強調秘書處同法律顧問有需要時會作出提點，至於係咪經得起法律挑戰就唔係秘書處能夠講嘞！當問到功能界別問題時，Kenneth先談及功能界別嘅歷史由來，但就無提及其存廢問題。Kenneth話，其實佢係想鼓勵同學多探索、多思考，從唔同角度分析事情喎！
