巴西世界盃賽事踢到如火如荼，無論男男女女都非常關注賽事，入咗十六強階段之後氣氛更加熾熱。中華廠商聯合會青委名譽主席Irene周雯玲，原來都係一個忠實球迷，為睇波不惜晚晚捱夜，就算凌晨四點鐘都一樣捧場。不過唔緊要，因為只要有波睇就成個人精神晒，第日返工都冇有怕。

周雯玲為撐愛隊不惜捱眼瞓凌晨四點鐘起身睇波。

連指甲都整埋做德國國旗嘅顏色。

講到鍾意嘅球隊，Irene即時伸出兩隻手指頭，原來佢整咗至愛球隊德國國旗顏色啫喱甲，仲襯埋身上一條紅色連身裙添。不過，咪以為佢睇波淨係為咗睇靚仔球員，佢對球賽都分析得頭頭是道o架，仲買中埋波膽，絕對唔簡單。佢講起日前德國對阿爾及利亞嘅十六強賽事時，話場波一開始就見到客隊個勢有啲狼，但德國以守為攻嘅策略似乎唔會失波，所以佢就估計會和波兼冇進帳收場，結果梗係贏波又贏錢啦！

第一手消息請下載on.cc東網iPhone/iPad/Android/Windows Phone Apps