相信大家仲記得，立法會財務委員會上周五喺一片爭議同混亂聲之中，通過新界東北發展前期工程撥款，負責主持會議嘅財委會主席「星爺」吳亮星被指「強行」表決撥款，事後變成眾矢之的。不過，星爺尋日出席公開場合嗰時，話對外界責難同質疑聲音一於少理，仲自爆出街時冇人當面鬧佢，反而有部分人讚佢做得好添，究竟乜嘢叫阿Q精神同自我感覺良好，星爺確係作出最佳示範！

星爺舊年被推舉接掌財委會主席一職，一直表現中規中矩無惹風波，皆因無風無浪，直到最近搞新界東北前期工程撥款一役備受批評。有建制派議員仲一度要求撤換星爺，最終星爺頂住壓力，喺上周五「強行」表決撥款並獲通過，新界東北前期工程撥款爭議先至暫告一段落，但星爺難逃一劫被人鬧爆，直到尋日佢趁七一現身馬場，就逐一回應外界對佢嘅責難同質疑。

唔介意畀人叮走

佢首先自爆出街時冇人當面鬧佢，部分人仲讚佢做得好添，自言唔驚有人想搵嘢掟佢表達不滿，相信大部分市民都係理性。佢又大方認有睇過街頭諷刺自己嘅塗鴉，強調唔同人有唔同表達方式，佢唔會干涉喎。當問到會唔會擔心主席位置「被叮走」，佢就話對係咪畀人叮走唔介意，仲話可以幫到市民上樓添。

面對泛民主派嘅窮追猛打，加上泛民支持者不留情面嘅狠批，星爺此時此刻都繼續自我感覺良好，有人講笑話可能係星爺從政經驗豐富，所以抗壓能力十足，對批評意見唔上心；一係星爺根本同批評者生活喺唔同時空，否則唔會一啲難受感覺都冇喎。不過，如果星爺真係抗壓能力十足，就唔會喺會議上畀泛民議員搞到沉唔住氣啦！

第一手消息請下載on.cc東網iPhone/iPad/Android/Windows Phone Apps