衣食住行樣樣貴 基層愈窮愈見鬼

工聯會公布今年第二季「兩餸一湯」指數，同舊年同期比較，東涌、荃灣、沙田同中西區平均價格升咗一成有多。其中東涌逸東邨街市買餸最貴，四人分量需要一百二十元，加幅達百分之十四，對基層家庭嚟講，都咪話唔重皮。係人都知，逸東邨係全港最多綜援戶嘅公共屋邨之一，街市餸菜加價幅度竟然係全港之冠，簡直不可思議。有立法會議員形容「愈窮愈見鬼」，真係一啲都冇講錯。

所謂兩餸一湯指數，係按三至四人家庭分量，購買七種基本食材，即係普通家庭嘅生活必需品，指數愈高，表示生活壓力愈大。表面上本港通脹率唔算高，五月份係百分之三點五，而且失業率低，幾乎全民就業，個個有工開添。問題係，官方嘅統計數字根本反映唔到基層市民嘅生活苦況，因為升得最勁最頻密嘅，正正係同民生息息相關嘅衣食住行各項開支。

嗱，年年賺錢年年加價嘅港鐵，今日起又加價百分之三點六喇。最慘就係，港鐵帶頭，其他公共交通工具有樣學樣，九巴下個月開始調整票價，離島渡輪亦唔執輸，連的士都醞釀緊加價，跟住可能輪到電費等等，簡直係一加俱加。

早排有項調查發現，本港基本薪金調整幅度，平均只有百分之三，家陣同民生有關嘅開支升幅幾乎全部超過呢個水平，薪高糧準嘅港產官僚就話冇有怕啫，試問餐搵餐食餐餐清嘅基層市民又點頂呢？

講起真係悲哀，香港自稱「國際都會」、「金融中心」，億萬富翁數字按人口比例遠高於美國，絕對算得上名列前茅嘅富裕社會。弊在富豪多，窮人更多，貧窮人口超過一百三十萬，平均每五個人就有一個窮人，而且唔少市民嘅收入連基本生活都難以維持，你話可唔可悲吖。

港府話就話制訂咗貧窮線，可惜得個睇字，扶貧措施講就天下無敵，做就冇心冇力。好似低收入在職家庭津貼咁吖，聲稱可以大幅降低整體貧窮率及兒童貧窮率，令三萬八千個家庭脫貧喎，但事實係限制多多，門檻太高，根本係口惠實不至。

分配不公，兩極分化，基層收入增長永遠跑輸通脹，呢個咪就係深層次矛盾愈演愈烈嘅真正原因囉。咪話太一叮唔提醒，如果當局再唔諗計紓緩基層市民生活負擔，等到深層次矛盾爆煲，港產官僚唔使旨意優哉游哉，日日睇法國電影歎咖啡吖，叮！