SUN奇古怪：SUN潮語：【巧滾動】
潮語「巧滾動」其實係指「好感動」，有啲時候亦會用「滾動」去代替「感動」。至於點解要將「好感動」寫成「巧滾動」，應該係出於無聊，將啲口音唔正嘅大陸鄉音粵語寫番出嚟。好似之前寫過嘅潮語「巧京京」，其實即係「好驚驚」讀歪少少。但係，如果真係以鄉音粵語去講「好感動」，應該係寫成「巧鹼動」至啱。不過可能「鹼」字難打，又或者純粹覺得「滾動」過癮，兼有一種淚珠喺眼眶「滾動」嘅意境，所以喺「飛士卜」或討論區上就有「巧滾動」呢個潮語。值得注意嘅係，有時有啲所謂「巧滾動」嘅留言，其實係講反話，恥笑有啲人嘅行為只係博同情。例如好似某絕食人士嘅遺書，就被譏為「滾動」之作。
呢幾日心情低落，做乜都冇乜心機。原因係見到香港今時今日嘅淪落，已經去到近乎無藥可救返魂乏術。但係呢個城嘅死因，絕對唔係淨係因為啲乜乜白皮書，又或者嗰位零票當選嘅二打六十九立法會議員吳亮星，運用議會暴力違反議事規則，強行通過東北發展前期撥款。呢個城市誠如殖民地前總督彭定康所言，係死在自己人手裏。好似頭先提及過嘅兩件事，令人憤怒嘅並唔係國務院，同嗰位「而我不知道他是誰」嘅吳亮星，而係嗰啲無知嘅港喱，死到臨頭都仲未知，見到吳亮星嘅做法仲拍手叫好嘅人。當然，不聞不問終日只顧搵銀食瞓屙嘅港豬，一樣係將香港推向死亡嘅幫兇，然而另一班出賣自己良知出賣香港而自肥嘅所謂愛國商人或港奸，更係呢個城市嘅癌細胞，令香港更加冇得救。最近網上有條短片，將香港嘅舊照片加上許冠傑嘅「香港是我家」作背景音樂，睇到我「巧滾動」，熱淚盈眶，就好似去喪禮睇先人生前片段一樣。
呢個六月，真係令人有山雨欲來之勢。中央、特區政府、建制派連環出招，似乎要「摑」醒香港人，唔好再瞓，要挺身而出為捍衞香港而抗爭。佢哋做咁多不利香港嘅事，後果比佔領中環更恐怖，並勢必推高遊行數字。希望各門派嘅香港人能團結一致，保衞我城，咁樣就真係令人「巧滾動」啦！
