香港政局最近立立亂，圍繞新界東北前期撥款的立會審議工作，及立會遭包圍衝擊的新聞日日不絕，社會唔係拗佔中就係拗白皮書。中文大學校長沈祖堯尋日在社交網站個人專頁留言，「I feel that I don't know this place anymore. 」此言一出即引起各界揣測。點解沈校長覺得唔再認識香港呢個地方？係因為激烈衝突定係政治爭拗呢？

設計圖片及對白

畢業禮抗議太自我

咁啱，沈校長尋日下午出席活動，我哋即刻趨前問個清楚，佢話，其實係見到議會內嘅衝突，先至有咁嘅感受。至於究竟係財委會主席吳亮星定係泛民嘅行為令佢感慨留言，佢就唔答喇！唔知佢對議會外嘅衝擊又點睇呢？沈校長話，明白青年人可能希望為弱勢社群發聲，但絕對唔認同用暴力衝擊立法會，因為抗爭手法應該係和平、理性咁話喎。

一個校長為青年行動有感慨，另一邊廂，演藝學院校董會前主席梁乃江亦有感而發，早前演藝學院畢業禮，有畢業生向主禮嘅政府高官高舉「官逼民反」標語，又做出交叉手勢抗議，行為出位，梁乃江話好彩佢在任時冇發生過咁嘅事，佢認為畢業禮係人生大事，係莊重嘅場合，應該要尊重啲。不過，可能時代唔同咗，年輕人太自我，佢發現唔單止演藝嘅學生係咁，其他大專院校都有類似事件發生，相信年紀愈大，有唔同經歷後，睇法會改變。

第一手消息請下載on.cc東網iPhone/iPad/Android/Windows Phone Apps