鄭承隆（左）揸住拐杖，同媽咪入馬場。
沙田馬場尋日有賽事，見到仁濟醫院前主席鄭承隆（Edwin）揸住拐杖，步履蹣跚咁入場，好少公開露面嘅Edwin媽咪就傍住佢，唔通受傷？Edwin話，約莫半個月前，佢喺一間餐廳用膳，咁啱清潔工人用水拖地，佢未有察覺地板濕滑，結果一跣一扭，左腳即告拗柴。嘩，邊間餐廳咁靠害？佢就好大量話無謂提喇。
雖然傷咗腳，但見佢都有講有笑，似乎情況都唔係太差，佢笑笑口話，其實好得七七八八，但係醫生擔心佢「重量級」身軀對膝頭有壓力，所以先至揸住拐杖，對生活起居已冇乜大礙。尋日佢有份嘅團體馬出賽，所以佢抱傷都要同媽咪入場打氣，之後仲要出席禁毒活動。
七一當日，佢都要撐住支拐杖去做嘢，事關佢係監警會宣傳及意見調查委員會主席，所以要親身落去遊行現場監場喎。
第一手消息請下載on.cc東網
