政壇：乳鴿借廁所 不忘抽荷里活水
去年有套荷里活電影攝製隊專誠來港取景拍攝，期間仲爆出被「陀地」兄弟勒索風波，最近套戲正在香港上映，民主黨（白鴿黨）區議員就趁機抽水。
上個月啱啱補選勝出嘅東區區議員張國昌話，佢都有份協助電影製作，細問之下，原來佢係借出議員辦事處洗手間畀電影攝製隊用，咁都叫做協助製作，唔知電影片尾使唔使特別鳴謝白鴿黨呢？
尋日，張國昌同趙家賢兩隻「乳鴿」特地舉辦遲來的父親節活動，以一家大細睇戲享受正價戲票六折優惠做招徠，安排一班街坊觀賞呢套荷里活大片，唔講仲以為白鴿黨區議員有份幫手拍攝添！
張國昌就趁機抽水話「陀地」風波發生前，佢的確同老外攝製隊搭晒膊頭，承諾幫對方保守借場拍攝嘅秘密，以免太多人圍觀引起混亂。
期間佢仲應承借出洗手間供拍攝團隊使用，可惜男、女主角始終都冇借廁一用，如果唔係仲威喇！
