政壇：伏明霞電腦放廳保護子女
港童問題多，尋日商務及經濟發展局前局長馬時亨（肥亨）大女馬露明旗下學校舉行畢業禮，唔少名人都嚟捧場，講起仔女教育經，財政司前司長梁錦松太太伏明霞話，為咗保護子女免受網絡欺凌，索性將部電腦放喺客廳，方便留意小朋友上緊咩網站。
與三名寶貝子女合照嘅伏明霞（左二），十分注重子女教育。
佢坦言，做媽咪嘅會擔心子女任何事，趁住依家子女仲細，佢決定管束多啲，最重要都係自細灌輸正確嘅德育同人生價值觀。
肥亨太太馬王培琪亦講到教女心得，佢話如果凡事都講「媽咪話」，就會好老土，身為基督教徒嘅佢會借助聖經，灌輸囡囡做人要善良，唔好害人嘅道理，咁就事半功倍咁話。馬太仲話，聆聽小朋友講吓佢哋嘅理想同夢想，再盡力去成全都好重要，但就千萬唔可以認同小朋友嘅「妄想」，幫佢哋做啲無可能實現嘅事喎。
