富者愈富冠全球 貧者愈貧港蒙羞

呢嗱，有國際金融機構發表全球財富報告，二十五個最大富裕人士市場中，香港過去五年無論財富定富豪人數嘅增長率都係最高，分別超過百分之廿八同百分之廿七。淨係舊年咋，全港擁有一百萬美元可作投資嘅富裕人士就多咗近一成，財富增長更接近一成二，問你服未。

富豪丁財兩旺，威盡全球，梗係香港之光喇。可惜吖，本港有另一項冠軍，直頭係香港之恥。冇錯，就係貧富懸殊冠絕全球發達經濟體嘞。呢，本地幾大富豪嘅身家共佔全港財富六成，而三成家庭資產連八萬港元都冇，富者愈富，貧者愈貧，兩者形成強烈對比，唔怪得堅尼系數一直名列前茅喇。

齋睇經濟數據，過去十年本地生產總值增長五成，弊在財富分配嚴重不均，全港家庭收入中位數十年嘅升幅只有一成。兩個數字一比較，連小學生都睇得出有問題喇，蛋糕愈做愈大，分配就愈來愈唔公平，兩極分化，堅尼系數有乜可能唔高企吖。

早前有調查顯示，美國六十萬人至有一個億萬富豪，而本港唔到十萬人就有一個，絕對算得上富裕社會。不過咁，富裕嘅只係少數人，據港府制訂嘅貧窮線，全港貧窮人口居然超過一百三十萬，平均每五個人就有一個窮人，你話丟唔丟架吖。

其實，呢個只不過係官方嘅統計，貧窮人口實際上可能唔止咁多添吖。最近有慈善團體參考美國嘅計算方法，按每月均衡營養膳食所需花費作為標準推算出嘅每月基本生活開支劃線，發現一人住戶貧窮線水平被當局嚴重低估，即係話，實際貧窮人口可能超過官方所講嘅一百三十萬，問你驚未！

近年股市暢旺，樓市熾熱，財富效應之下，富豪人數愈來愈多不足為奇。問題係，富豪身家不斷膨脹，但大多數基層市民就成為高樓價嘅犧牲品，生活質素每況愈下，連中產階級亦不斷向下流，唔少人淪為劏房住客，只能望天打卦。貧富懸殊惡化，各種深層次矛盾因此而起，搞到民怨加劇，社會愈來愈政治化，近年示威不斷，永無寧日，唔係冇原因o架。

香港多富翁，窮人褲穿窿，既係香港嘅現實，亦係香港嘅悲哀。計太一叮話齋，港府如果真係「適度有為」，唔該發財立品，除咗開倉濟民，更要認真諗辦法助民脫貧。否則，一個富豪多、窮人更多嘅社會，只會愈來愈激，愈來愈亂嘅咋，叮！