城中鏡：許曉暉搵專家解讀沉香奧秘
沉香罕有而昂貴，所以近年本港有唔少不法之徒亂斬沉香樹，搞到數量愈來愈少。不過，民政事務局副局長Florence許曉暉就搵來老友，資深收藏家Paul簡文樂講解真正沉香嘅奧秘，發現不法之徒盜取亂斬嘅沉香樹，其實係同價值連城嘅沉香截然不同。阿Paul話沉香係來自沉香樹嘅樹脂，棵樹要最少有五十年樹齡先稍為可以形成沉香，所以咩都唔理就亂斬樹的話，只係做笨賊。
簡文樂（右）講解沉香樹同真正沉香嘅分別，在旁嘅許曉暉聽得好入神。
「棋楠木雕童子拜觀音」沉香珍藏。
頂級沉香叫「伽南」
Florence尋日到中環一間私人博物館參觀，博物館創辦人就係阿Paul，除咗參觀館內珍藏外，阿Paul仲充當導遊，沿途講解沉香嘅由來。原來沉香唔單止同佛教有關，基督教、天主教同伊斯蘭教等都有提及沉香嘅故事。沉香係沉香樹為修補樹身嘅缺口而流出樹脂汁液，呢啲樹脂經過數百年凝聚就會變成具有獨特香氣嘅沉香，所以若要採摘沉香，根本唔使斬樹，只要割去呢啲樹脂就得喇！
沉香點解會咁值錢？阿Paul話咪係因為珍貴同香囉，只要燒細細粒沉香，成間屋都會即刻香晒，所以阿拉伯呢個沉香入口量全球第三多嘅國家，國民唔單止會以燒沉香來表示對賓客重視，女子婚嫁時亦會以沉香為嫁妝添。不過，點去分辨沉香真偽呢？佢話世界各地都有假沉香，所以要學識睇吓啲木紋，靚嘅沉香多數喺沼澤中打撈上來，所以會有水紋，呢啲叫「水格」沉香。至於頂級沉香就叫「伽南」沉香，聞一聞都覺得香氣撲鼻。
阿Paul講解期間，Florence都聽得好入神。阿Paul教路，只要小心研究，再加上累積經驗，就會分辨到沉香嘅真偽，佢笑言自己都失手過好多次。佢又希望港府能重新喺香港多種沉香樹，建立番香港為沉香進出口最大市場，否則香港冇香樹就真係好搞笑喎！
