SUN搞作：打橫嚟講：何解香港今日會咁亂？

香港特區近兩年來的混亂，是開埠至今一百六十多年來未曾有過嘅咁混帳。一大群廢柴庸官不特只管治無方、手忙腳亂，更有人伺機渾水摸魚，如貪曾貪湯及貪許等已知的賤精外，應仲有好多暗角牆邊遲早現形，走着瞧吧！

就係因為廢柴貪官當道，便造成民不聊生、民怨沸騰，加上謊言偽語政府無公信力，還下下以強權脅迫、武力威嚇、不聽民意，在此怒憤臨界點的危情下，無人想見到的動亂衝突，可謂一觸即發。

當全港七百萬人皆感受到暴風雨前夕的詭異時，呢個政府竟仲火上加油，似驚死香港不暴動咁！愈亂愈好乎？

除新界東北方案出岔子，因佔中而衍生的全民公投，又無端端掟本白皮書出嚟變相吹雞拉票，咁都未算失策，依家，又爆出史無前例的網絡攻擊，以為可以藉此癱瘓人家網上投票，真蠢過隻豬。香港不同大陸呀！呢啲笨蛋行為，只會令港人更加積極到「實體票站」投票，排滿長龍的悲壯畫面就加震撼人心囉！

有反智者講陰謀論，話攻擊網上投票的幕後黑手，不一定係「中港政府」，有可能係主辦者的詭計谷票咁話，喂！家陣講緊係過萬部電腦同時出擊的運作，亦係幾百萬營運費的「大生意」呀！所以，只有益咗啲賤精趁亂索取維穩費囉！亦解釋咗何故有人會放軟手腳，任得香港愈亂愈好囉！

近日坊間最好的一句口號，係「自己地方自己救」，各位小市民，自救多福吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府