政壇：搞搞政：鄉局圖復辦學校校董流會真掃興

依家新界鄉議局有兩間中學，一間位於元朗區，另一間就喺大埔區，至於以前位於大嶼山梅窩嘅南約區中學早前因為殺校，局方就將土地交還教育局，但最近佢哋又想攞番塊地嚟重開學校。鄉議局日前開執委會就傾到復辦學校嘅事，期間竟然爆出大埔區中學校董會最近五次召開校董會會議，都因出席人數不達合法人數而流會。

設計圖片及對白

就嚟就去都撞公務

嘩！連現有學校開會都搞唔掂，仲邊有說服力叫政府畀番塊地佢哋去復校呀？睇嚟主席劉皇發都要發吓功，叫班校董聽話開會先得嘞！

鄉議局轄下教育、文康及宣傳委員會就話，校董會會議出席情況唔好，效果亦唔係太好，所以希望各校董若未能出席會議的話，就應該請假喎。吓，原來缺席不特止，仲連假都唔請呀？有關成員就呼籲各位校董務必出席今個月底嘅校董會會議喎。

但有執委就話，呢個係溝通上不足所致，而且因為學校方面訂定開會日期同時間選擇不足，搞到大家每次去開會都好辛苦，啲時間就嚟就去都同其他公務相撞，又有執委話因為學校校長轉得太快喇，所以大家都好難適應喎。